Categories
في رمضان شبكشي …
Month: April 2021
Categories
ليوم في كازا …
ليوم في كازا …
جهة گراج علال كنت تقديت سلعة لي نهز معايا لفاس غدا ان شاء الله ….جمعت كلشي بارفان شديت طاكسي مع شعب راجع فحالي ..
اوا مع زحام روينة …طريقة عامرة boom …في اتجاه معاكس واحد سيارة من نوع ( فلوسلفاگن توارگ ) موديل جديد سيگها واحد سيدة هربت غا شويا على طريبورطور كان يجر ليها جناب كامل…
اوا سيدنا كرام …واحد خونا راكب قدام حدى مول طاكسي…هو يعلق على اللقطة :
شوف دين مهم هذا عيالات غا هما لي عطاتهم وقت في هذا بلاد كحلة هما لي دارو لباس ركبو على طومبيلات دارو مشاريع …. تلقاه وخدها ليها غا شي زلال ديالها او شي رجلها …يا نعل دين هذا لي كيعطي عيالات بيرمي….خونا عندو حقد دفين على عيالات….كانو خاصو غا سبة …
هذا نوع منتشر بزززاف في مجتمعنا …اي بنت اي سيدة راكبة على حديدة مزيانة…ساكنة في بلاصة مزيانة …عايش luxe….راه قحبة إذ لم يثبت ذلك خاص تحوم حولها شكوك….هذا هو منطق بعض شباب في مغرب…
انا ضربت على سيدة لي في توارگ…تا مول طاكسي ضرب عليها….سيدة باين طبيبة حيث معلقة ماكرون في زاجة …حيث عندهم حق كأطباء يعلقو ماكرون…
هو يدخل مول طاكسي عجبني تدخل ديالو …قال ليه أ ولدي :
راه حنا لي ما قريناش قدها…سيدة راه طبيبة …واش بغيتها تركب معنا في طاكسي…تا نكونو قرينا قدها سهرنا ليالي كنحفو عينينا في كتب و مراجع قدها …ديك ساعة دوي ..
خونا تكمش حس بصهد تحث منو …بغا يقلبها مال طبيبة ماشي شفارة …تلقها مخليا مرضى خارجة راه گزارة أ شريف هدو …
صافي تماك سالينا حوار …مول طاكسي زاد في صوت راديو …كان خدام ديسك عبد الهادي بلخياط يا بنت ناس أنا فقير دراهم يومي معدودة….
Categories
في حياتنا…
مستحيل كلشي يحبك يبغي لك الخير …ضروري تتلقى بعض نفوس الخبيثة و المريضة …لكن يكون من الغباء الى كانو في حياتك 100 ناس…99 في مئة كيبغوك لله في لله هاكك … بلا زواق بلا نفاق …كتبقى واحد في مئة اشرار فيهم الخبث و الغل غا هاكك اتجاهك وخا انت ما ضرتهم في وااو اصلا ما كتعرفهم ما كيعرفوك …في هذا سياق نعود ليكم واحد بلان وقع ليوم
واحد سيد X …ماشي صديق عندي ما كنعرفو ما كيعرفني عمر جمعنا مسانجر …يعني واحد داير لك أبوني …هذا سيد مرة مرة كيعلق ناذرا …تعاليق سلبية فيه ريحة سم و حسد و شر …غير ما مرة دراري دريات خرجو فيه طول عرض …انا طبعي كنقلب ستة تسعود…
يوم كنكتشف من واحد صديق ديالي بعد ما شاف خونا علق البارح على طلعة ديال شيباني في اكادير تعليق طبعا كل سم …قالت ليا واش تعرف هذا سيد لي علق لك قلت ليها لا …ما بيني بينو والو…قال ليا راه شحال هذه كنت علقت لك في منشور على مرض الام ديالك …
دخل عندي هذا خونا للخاص قال ليا عنداك تيقو راه الام ديالو ما مريضة بسرطان ما والو …غا متافق معها باش يبيعو برفان….قال ليا صبنتو قلت ليه نعلة الله و عليك يا الخبيث بلوكيت القرد…
دابا تخيلو أ شباب شر الانسان فين كيوصل بيه لحد…غا حيث هو نكرة عايش على هامش…ما قدرش يكون انسان زوين و مقبول…شوف اش قالت ليه نفسو الامارة بالسوء…تلقاه دخل عند عشرات إنبوكس ما كيعرفهمش غا شافهم كيتفاعلو معايا بكل وقاحة كيحط باطل و زور …
هذا نماذج من ديما كانو في حياتنا …من ديما يكون…عايشين في ظلام …غالبا من صحاب نظرية ” ما كنحملوش غا هاكك كنكرهو ..” مع انت ما مسوقش كيزيد داك مرض ديالهم كيكبر داخلهم…فحال هذا خونا …هذا نوع ممكن يحضيك تا تريح في قهوة…يخليك تا تنوض تدوي في تليفون او طواليط يلوح لك شي لعبة في كأس…دون تأنيب ضمير …
كنت كنسمع فحال هذا قصص ما كنتش كنصدق….لكن من يوم نبدا نصدق ….هذا شر مجاني متجدر في بعض ناس …رغم ذلك مكانهم الجحيم اللامبالاة …انا لي كيهمني ناس لي كيبغوني كنبغيهم…ناس لي وخا كنتخلف معاهم كنقود سوايع كريح من بعد قلب صافي…
اما هذا الاشباح و مخلوقات ظلامية…ما يوقفوش لينا الحياة….نخلوهم سمهم يقتلهم…كان ممكن ندعي دعوة ظالم مستجابة….بأنك تصاب بسرطان او مك او باك او ولدك …لكن علاش نخلي شر يطغى …ندعي بحاجة واحدة الله يبعد طريقنا من طريق هذا الاشرار….قولو امين …
Categories
الحقيقة مرض
الحقيقة مرض، هكذا يدعي نيتشه،بل قد تكون نوع من أنواع الموت..أن تستكين الى حقيقة ما، يعني أن تتوقف عن التفكير، أن تتحول الى حارس فكرة او مجموعة أفكار،لكن علينا أن نعترف أن هناك حقائق في الكون، لايمكن القفز فوقها أو إنكارها،كروية الأرض، النشوء و الإرتقاء، الرجاء أفضل من الوداد..إلخ..
حقيقة أخرى لايمكن التشكيك بها،حتى ولو إمتلكت روحا هيومية،قدرة المخزن على إفساد الشيوعيين…مثلا الشيوعي أندري أزولاي،إنتهى به الأمر مستشارا لرأس المخزن، بن عبدالله المادي الديالكتيكي،تحول الى رئيس لبعثة الحجاج كأي خوانجي متشبع بالرجعية و رائحة المسك، حسن أوريد اليساري الهوى، علي يعتة أمره الحسن التاني بإنشاء حزب يحوي كل الشيوعيين، إلياس العماري،الرفيق الناري،حوله المخزن الى إقطاعي و رأسمالي يمتلك مالا ،زاده الله،مال لا تقدر النار على إكمال حرقه..
حتى أنه من كثرة افساد ذوقه البروليتاري،تخلى عن صلعته التي تشبه صلعة ماو تسي تونغ،و قام بزرع شعر رأسمالي متعفن.
Categories
الاكتئاب ( أ لامود )
دراري دريات الفايسبوك…
ولا عندهم الاكتئاب طوندونس زعمة ( أ لامود ) لي حازق او تخاصم مع صحبتو كيقول لك انا كنعيش حالة اكتئاب …
ولا بنادم هو كيدير جلسات استماع كيقوم بخدمة طبيب كيشخص حالة ديالو انه اكتئاب ….ولتي فيما دور كتلقى مع جوج تا عشرة منشورات يوميا كيقول لك صاحبها انه مكتئب …منين وصل لهذا خلاصة ما نعرف….
هذا شي شباب ما فيهش ضحك ما فيهش حقة بان لك بنادم كاتب مكتئب راه مكتئب …تا انا مكتئب …تا ولاا اكتئاب عندنا فحال لا غا حرقة معدة ….لا لا لا أ دراري دريات …كاين لي ولا داير هذا العيت غا دخلة لجقير الاهتمام تحرك عندو دعوة في مسانجر…يالله صافي هاكا ها نودز غا ضحك …و صافي ضحك
باش توصل اكتئاب راك على حافة انهيار كإنسان الاكتئاب ما يعرفو غا طبيب يشخصو غا انسان فنى عمرو في علم نفس و تحليل ….مرض ما تبغيه لا لصديق لا لعدو …راه ناس ماتت ناس انتحرت ناس فقدت شغف بالحياة…
خلونا من سطوريات مع مزيكا تركية حزينة …منشورات ديال ورا 12 ليل ….اكتئاب مقود بززززاف …لي عاشو شاف طبيب تبع علاج هو لي يكون عارف اشنو ديك تجربة…
اذن براكة ما توهمو كركم راه عندكم اكتئاب ….حيث اكتئاب فحال سرطان تقدار تعيش بيه انت ما حاسش گاع …فقط كشف ديال مختص هو لي كيوصل ليه…ماشي منشور فيه تعليقات و الله تا انا بحالك مكتائب …فيقو معنا راكم شباب زعمة و واعي …
Categories
و حق رب راه غير …
لي بغا يصدع كرو بالقرايا خصوصا في مجال مسرح تمثيل …
سير ضبر لك على شي كونط فيه 500 ألف بشر…بقا تلوح شي لعيبات سطوريات تلصق صحاب مليون لفوق يطاگوك في سطوري….خسر مرة مرة شي 10 دولار سبونسوغزي…
ها دعوة غادي تگعد…اما لا كنت تجيد فن تمخشيش…و لي تلاقيتي معاه تقول ليه واااو مقود….كونصيبط واعر درتي …وخا يكون خرية گول ليه مقود…ضحك تا تبان ضرسة عقل….
كون اكيد رمضان جاي لقاوك فشي سيت كوم ….اما لا كنت بنت عليك بتصاور نهدين مؤخرة….مرة مرة لوحي شي سطوري كتعيري شي صحبتك في حرفة ديال انستغرام…يا سلام لا كان صوتك مقبول…
غا سيري فتحي كونط جديد فين يدوز ليك كلشي ديال مسلسل رمضان…
ناس لي تجي تصدع لينا كرنا بالرداءة و الاعمال باسلة…و كاميرا مفروشة….صافي الله يجعل براكة …قلبو ستة تسعود….راه سنوات حنا كنعود نفس الهدرة…تا هذا عام راه نفس ستون هو لي كاين…
فيلم رمضان كامل بريكول ….كتمعش فيه قضية…الله يسر على جميع….غا هو ما يجي تا حد تا وحدة تلعب فيها يلعب فيها فنان فنانة…هنونا شوية ..قولو حنا كنضبرو على راسنا …هانية اما باش تلعب ليا فيها سطار …دور قود راه حنا ماشي ابوني ديال انستغرام…
واحد مرة …
دخلت سطاربوكس …عرضت على صحابي….تا هما عمرهم دخلو ….
دخلت انا واثق …قلت ليه ارا شي ثلاثة قهاوي باردين دير لينا گلاصون…وجد كموند…عطيت دراري ….
مع جغمة الاولى…شي كيشوف في شي….مهم كان ضروري واحد يبدا معيور ….هو يقول ليا حمزة مرجاني :
الله ينعلك دنيا و اخرة….اش هذا زمر جايب لينا ….و كملو ضحايا اخرين. ..بمعيور و سبان لاحو حزاق كلشي في زبل….
لحد ساعة كندوز من حدا سطاربوكس كيبان ليا بنادم مريح عايش هيلمان …كنقول ويلي كيفاش أ صاحبي …واش كيكذبو على راسهم….او كيكذبو علينا…
Categories
واحد نهار غسان كنفاني قال:
” لا تغادر الموقف، أي موقف، قبل أن تقول فيه كل شيء ترغب بقوله…”
فعلا الى تعمقتي في هذا قولة تلقى فيها كثير من الصواب …بل الى كانت عندك غا شوية شجاعة درتي ليها اسقاط على مواقف في حياتك…تلقى فعلا ان سواد الاعظم ديال قوادة سببها انك :
بقيتي غا كتنقز من موقف لموقف …دون تذبر و تأمل انت راك غادي في الخسران أ حمادي …كتكذب على راسك راه هذا شي ما بقاش يتعود…انه صلح خير …الله يسامح …اش دير نصبر ….كتبقى كتجر في علاقة مع صحابك او صحبتك مع اصدقاء مع عائلة …علاقة دين مها خلقت ميتة من الاول ديالها …
انت راه كتبان لك غادين تخرجو في الحيط مباشرة…حياة كتعطيك فرصة تحط نقط على حروف تفرگع في وجه بنادم ( فاص – فاص ) تقول ليه اجي ريحو في طابلة …ارا ليا دوك ملفات ناقشوهم نشوفو فين كاين خلل…فين كاين ثقابي …علاش ديما كنرجعو نقطة صفر…اجي فاش ضارك انا اشنو فيا لي خايب….سالتي اجي نقول لك اشنو مقود فيك….
تفرگع رمانة …يا اما تصفى لخواطر نكملو على اسس صحيحة نية سليمة صادقة …يا إما يبان لينا بجوج بالملموس مما لا يدعو لشك…اه ما صالحينش لبعضنا…غاديين في خراب و دمار نفسي ..الله الله يعون بكل ود و احترام..
للاسف هذا مواجهة الاغلبية كييتهرب منها …تا كيلقى راسو الانسان ضرب 20 عام في علاقة اصلا من الاول غالطة…عندو ولاد صافي غرق ديال بصح….كتولي حياة غا دافع كروسة و صابر …اما متعة حلاوة حياة مفقودة تماما ….
كاين لي غا مع صحابو عايش سنين ستريت مقود ما جاه تل رباح منهم بالعكس داير PAUSE …راجع مارشريار …لي بغا يدرها كيقول ليه تكمش أ زمر طفروه تا لي قبل منك ..ديما كيبغي يتفرگع عليهم…كيغمق على راسو بالعشرة و الطعام و الملح و كسكسو و دنجال و حوت كواري …
المواجهة في المواقف شجاعة…و دليل على انك باغي ديك علاقة تكبر تعمق تمشي بعيد…الهروب خطاب ديال صافي هانية ما هو الا جبن خوف حيث في كرشك عجينة خايف تكون انت لي غالط في حق داك الانسان…
حنا جيل تربى على سياسة الهروب الى الامام…كنجمعو مشكل على موووشكل …على موشكل…على موشكل. ..كنقولو راه وقت زمان كفيل يصلح كلشي…لكن حقيقة انه مشاكل في حياتنا لا تخضع لقانون تقادم…بل كتبقى تجمع علينا تا شي نهار كيطيح علينا داك صندوق على راسنا ممكن يقتلنا گاع ….صندوق لي كنا كنجمعو فيه مشاكل لي هربنا منهم…للاسف كاين گاع لي كيخليهم ورث لولادو و بناتو …
الحفل المصري و الفخر الذي يكاد ينط من أعين المصريين،يعلمنا أو يعلم الإنسان الحديث ، أن الحضارة التي تدوم في الزمن،تحتاج الى مركزيات..قد نختلف حولها..لكنها ضرورية..الله و الدين ، سلطة قوية ،لغة و وطن..بدون سردية كبرى و أسطورة مؤسسة،لن تبنى حضارة عظيمة..
الناس يضحون من أجل من يخاطب أرواحهم،يبنون الأهرامات و الكاتدرائيات و المساجد الضخمة و الأبراج .. من أجل فكرة تتجاوز كل محاولات التعقل..قد ينجح العقل في بناء حضارة،لكنها لاتمتد و لا تنطبع في التاريخ..
المادية العلمية بكل مؤلفاتها أنتجت حضارة عمرها سبعون عاما فقط،في حين يهودي صلبه الرومان،لم يكتب سطرا واحدا ، قامت على تعاليمه حضارة ألفي عام و لاتزال ممتدة الى يومنا هذا..الفراعنة و الأشورريين و الفرس و الصينيين و المايا و الأزتيك..تركوا لأحفادهم أشياء ،لم يعد الأنسان الحديث،المزهو بتقدمه التقني و يقينه،قادرا على تركها لإحفاده..التقنية و الرخاء ،ليستا كل شيء.
Categories
اشهر الكذبات لي ما كيضموضاوش عندنا!
