Category: وجهة نظر

عام 2021، إلى حد الآن، شكل بالنسبة لي العام اللي اتخذت فيه قرارات كثيرة، أهمها:

1. تنقية محيطي الشخصي، فابتعدت عن عشرات الأشخاص اللي كنت كنعتبرهم أصدقاء وعشران، بعدما دقَّقت فتعاملهم معاي بمنطق ”الربح والخسارة”، ولقيت باللي خاسر معاهم، مادياً ومعنوياً، وباللي غالبيتهم كنت بالنسبة لهم “مجرد وسيلة” لمتعتهم الشخصية، وملاذاً لهم، يلوذون به، فراراً من هزائمهم، وفراغهم. إضافة لسلبيتهم اللي استنزفت طاقتي الإيجابية بزاف، زد عليه أن بعضهم متعدد الأوجه.

وهادشي مكيعنيش أنهم خايبين، وباللي أنا زوين، وإنما كيعني أنني اتخذت قرار كنشوف فيه راحتي، سوا كان قرار غالط، ولا صحيح، فنظرهم. مهم فيه سلامي الداخلي.

2. ابتعدت فيه عن وسائل التواصل الاجتماعي، وولا ارتباطي بها قليل بزاف، خصوصاً الفايسبوك، وولات علاقتي بها لا تتجاوز بعض السطوريات اللي كنلوح فالواتساب والانستغرام، واللي مكتاخدش من وقتي -فالنهار كامل- حتى جوج دقايق، وإلا زدت لها التصفح د داكشي اللي لاحوه الناس، نقدر نوصل لنصف ساعة على طول اليوم، حيت داكشي كامل اللي كنت كننشر، سوا كتابة، أو صوتا وصورة، وعلى الرغم من أنني درت به بلاصتي -كصديق افتراضي- وسط آلالاف الناس، من كل أنحاء المغرب وخارجه، واللي كيعبرو عن حبهم لي، واحترامهم لآرائي ولمواقفي عبر تعليقاتهم، ولا رسائلهم فالخاص، ورغم علمي باللي بزاف منهم كيستافد من شحال من حاجة كننشرها، بشكل مباشر، أو غير مباشر، ولكنها كانت وسائط تواصل تستنزف طاقتي، وتمتص جهودي، وكتاخذ من وقتي، وخا هو أصلا شايط، على حساب أمور أخرى ممكن تكون أهم؛ بحال القراءة مثلا اللي هي أكبر متضرر، حيث إن مقروئي في السنوات العشر الأخيرة، لا يتجاوز بضعة كتب معدودة برؤوس الأصابع، بعدما كنت كنقرى ما بين 50 حتى 80 كتاب فالعام، بلا منحسب المقالات التحليلية، والتقارير والتحقيقات الصحفية، والبحوث العلمية المنشورة فالمجلات المختصة، اللي كنت كنقراها بنهم شديد.

3. وفهاد العام، كذلك، غيرت طريقتي فالتعامل مع خدمتي؛ فقبل 2021، كنت كنحرق بزاف أعصابي باش نغير عقلية التلامذ المليئة بالإحباط، ونعاونهم يكونو إيجابيين فحياتهم، وكان كيبقى في الحال ملي كنشوف شي تلميذ مكايجيبش مزيان فقرايتو عامة، وفالمادة اللي كنقري خاصة، وكاندير المستحيل باش يكونو متميزين. ولكن لقيت باللي كنطحن بزاف من طاقتي، بحال إلا غادي نخدم غير 10 سنين، فحين أنه مزال قدامي 30 أخرى، وميمكنش نحرق طاقة 30 عام فعاميْن، ولا 7 سنين.

فوليت كاندير الواجب ديالي بأقصى جهد نقدر عليه؛ ولكن اللي معندوش سوق، مغانحفيش معاه الحجرات ديالي كاملة، واللي معندو سوق، مخاصنيش نهز له الهم بحال إلا أنا اللي والدو، وبحال إلا هو مسؤوليتي، حيت اكتشفت باللي داك الهم اللي كنهز لتلامذ سلبيين، كيستنزفني بزاف.

لذلك، باش نحافظ على طريقتي واستراتيجياتي فالعمل فميدان التعليم، وفنفس الوقت مستنزفش راسي، بقيت محافظ على فلسفتي اللي كتعتمد -أساساً- على تكوين المتعلم/ة على النظر للحياة بعين العقل، وعلى امتلاك حس نقدي يقدر به يرسم مسارو باختيارو، وعلى تعليمه كيفية التعامل مع الخطابات الإنسانية، وتحليلها وتفكيكها، ارتباطا بمادة التخصص، وكيفية الاشتغال بآليات التفكير العقلاني الرزين، وعلى غيرها من قيم كبيرة، وطرق علمية رصينة، وفنفس الوقت، مغانعذبش راسي، ونكون مهموم بسبب تلامذ لا يهتمون، ولا يرغبون في التعلم.

وحافظت على روحي الإنسانية اللي كتخليني نعطي من وقت فراغي لهم، بحصص دعم، وتأطير مستمر فأنشطة تربوية موازية، وفق تنظيم مؤسساتي دقيق، متمثل فنادي أسستو من نهار حطيت رجلي فمؤسسة الاشتغال، كيكرس عمل الفريق، وروحه.

وحاليا، بعدما وفرت بزاف د الوقت، وليت كنعيش فوضى، بسبب الفراغ الكبير، وكنعيش معركة إعادة ترتيب هاد الفوضى، باستعادة شغف القراءة، وتنظيم الكتابة، حيت ماشي ساهل ترجع لعادات قديمة بروح جديدة ناضجة، بعد صراع التخلي عن عادات جديدة تتميز بالسهولة والإغراء.

وملي ننجح فهاد التجربة، نتقاسم معكم الخطط العملية اللي خدمت بها.

يمتاز المغرب كباقي البلدان التي تضع رجل في الحداثة و أخرى في التقليد، بنظام اجتماعي و سياسي هجين، يزاوج بين شحال من حاجة، من بينها القانون و نظام بنت الكوميسير..هذا الأخير سابق عن القانون، و شكل الدول الحديثة، و قيمة المساواة التي لم يعرفها المجتمع المغربي الا بعدما أطل علينا الإستعمار برأسه و رسالته الحضارية التي كان يستخدمها لقضاء أشياء في نفسه..بنت الكوميسير ليست حادثا عابرا، بل هي الأس الذي تنبني عليه الدولة المغربية و مجتمعنا الحبيب، البنيوية الكوميسارية..تصور شمولي، يبدأ من قمة هرم الدولة، يوقر صاحب هاته البطاقة، وينتهي عند أبسط موظف الذي أوصاه إبن عمة فلان عن فلان لكي يمنحه شهادة الحياة دون أن يشد السربيس،وقد تمر بالفرملية التي اوصتها جارتها عن فلانة التي ستلد برهوشا الاسبوع المقبل، و علان الذي يركب في الطوبيس فابور لأن إبن خاله كنترول في شركة النقل..البنيوية الكوميسرية، أو كما يسميها جاك بيرك، نظام الأعيان، نظام تراتبي أوليغارشي، تسود فيه علاقات هيمنة، تنظمها و تحكمها انتماءات قبيلة و زاوياتية و طبقية، سابقة عن كل أشكال الإنتماء الحزبي او الايديولوجي..الخ..فالكوميسير ليس رتبة شرطي، بل صفة كل شخص يمتاز برأسمال اجتماعي وعائلي واقتصادي، وقناة للتعبئة والوساطة بين الإدارة والناس، تجعله يعتلي مرتبة مهمة داخل المجتمع..فقد يكون رجل سلطة، فقيه، طبيب، أستاذ، أو حتى رب الأسرة ..كل يتصرف وفق بنية ذهنية موحدة، طبٌع معها الجميع، ويعيد إنتاجها، حسب مايسمح له به، وضعه المادي و الإعتباري..فالقائد الذي سمح لإبنة الكوميسير بالمرور، لم يفعلا شيئا، الا الخضوع لنظام و بناء ذهني و نفسي يؤمن به، سواد المغاربة..و إخضاعة للتحقيق، ليس الا در للرماد في العيون، وخضوع، ومس بأحد ركائز النظام و المجتمع المغربي..فلان ديالنا!..فكلناا كوميسير و كلنا بنت كوميسير..ونتمنى إطلاق سراح القائد و إعادته لوظيفته، و الإعتذار منه..بل علينا أن نرفع أكف التضرع الى البارئ تعالى جده، في هذا الشهر الفضيل، لعله يرضى و يقبل إعتذارنا.

مستحيل كلشي يحبك يبغي لك الخير …ضروري تتلقى بعض نفوس الخبيثة و المريضة …لكن يكون من الغباء الى كانو في حياتك 100 ناس…99 في مئة كيبغوك لله في لله هاكك … بلا زواق بلا نفاق …كتبقى واحد في مئة اشرار فيهم الخبث و الغل غا هاكك اتجاهك وخا انت ما ضرتهم في وااو اصلا ما كتعرفهم ما كيعرفوك …في هذا سياق نعود ليكم واحد بلان وقع ليوم

واحد سيد X …ماشي صديق عندي ما كنعرفو ما كيعرفني عمر جمعنا مسانجر …يعني واحد داير لك أبوني …هذا سيد مرة مرة كيعلق ناذرا …تعاليق سلبية فيه ريحة سم و حسد و شر …غير ما مرة دراري دريات خرجو فيه طول عرض …انا طبعي كنقلب ستة تسعود…

يوم كنكتشف من واحد صديق ديالي بعد ما شاف خونا علق البارح على طلعة ديال شيباني في اكادير تعليق طبعا كل سم …قالت ليا واش تعرف هذا سيد لي علق لك قلت ليها لا …ما بيني بينو والو…قال ليا راه شحال هذه كنت علقت لك في منشور على مرض الام ديالك …

دخل عندي هذا خونا للخاص قال ليا عنداك تيقو راه الام ديالو ما مريضة بسرطان ما والو …غا متافق معها باش يبيعو برفان….قال ليا صبنتو قلت ليه نعلة الله و عليك يا الخبيث بلوكيت القرد…

دابا تخيلو أ شباب شر الانسان فين كيوصل بيه لحد…غا حيث هو نكرة عايش على هامش…ما قدرش يكون انسان زوين و مقبول…شوف اش قالت ليه نفسو الامارة بالسوء…تلقاه دخل عند عشرات إنبوكس ما كيعرفهمش غا شافهم كيتفاعلو معايا بكل وقاحة كيحط باطل و زور …

هذا نماذج من ديما كانو في حياتنا …من ديما يكون…عايشين في ظلام …غالبا من صحاب نظرية ” ما كنحملوش غا هاكك كنكرهو ..” مع انت ما مسوقش كيزيد داك مرض ديالهم كيكبر داخلهم…فحال هذا خونا …هذا نوع ممكن يحضيك تا تريح في قهوة…يخليك تا تنوض تدوي في تليفون او طواليط يلوح لك شي لعبة في كأس…دون تأنيب ضمير …

كنت كنسمع فحال هذا قصص ما كنتش كنصدق….لكن من يوم نبدا نصدق ….هذا شر مجاني متجدر في بعض ناس …رغم ذلك مكانهم الجحيم اللامبالاة …انا لي كيهمني ناس لي كيبغوني كنبغيهم…ناس لي وخا كنتخلف معاهم كنقود سوايع كريح من بعد قلب صافي…

لي بغا يصدع كرو بالقرايا خصوصا في مجال مسرح تمثيل …

سير ضبر لك على شي كونط فيه 500 ألف بشر…بقا تلوح شي لعيبات سطوريات تلصق صحاب مليون لفوق يطاگوك في سطوري….خسر مرة مرة شي 10 دولار سبونسوغزي…

ها دعوة غادي تگعد…اما لا كنت تجيد فن تمخشيش…و لي تلاقيتي معاه تقول ليه واااو مقود….كونصيبط واعر درتي …وخا يكون خرية گول ليه مقود…ضحك تا تبان ضرسة عقل….

كون اكيد رمضان جاي لقاوك فشي سيت كوم ….اما لا كنت بنت عليك بتصاور نهدين مؤخرة….مرة مرة لوحي شي سطوري كتعيري شي صحبتك في حرفة ديال انستغرام…يا سلام لا كان صوتك مقبول…

غا سيري فتحي كونط جديد فين يدوز ليك كلشي ديال مسلسل رمضان…

ناس لي تجي تصدع لينا كرنا بالرداءة و الاعمال باسلة…و كاميرا مفروشة….صافي الله يجعل براكة …قلبو ستة تسعود….راه سنوات حنا كنعود نفس الهدرة…تا هذا عام راه نفس ستون هو لي كاين…